Дали Витамин Ц Навистина Помага во Случај на Настинка?

Витамин Ц (аскорбинска киселина) е еден од најпознатите и најчесто користени суплементи, особено кога станува збор за превенција и третман на настинките. Неговата популарност започнува уште од 70-тите години на минатиот век, откако неколку студии и книги го препорачале како ефикасно средство за зајакнување на имунитетот и намалување на сериозноста на симптомите при настинка. Но, дали навистина витамин Ц помага да се спречи или намали времетраењето на настинката?

Што Вели Науката?

Кохрановиот преглед, кој вклучува 29 истражувања и повеќе од 11.000 учесници, нуди најсигурни информации за ефектот на витамин Ц во спречувањето и третирањето на настинките. Истражувањата во прегледот се поделени во две групи: оние што ја испитуваат секојдневната суплементација и оние што ги истражуваат терапевтските дози.

• Секојдневна суплементација: Редовното земање на витамин Ц секој ден, без разлика дали имате симптоми или не, покажа минимално намалување на времетраењето на настинката кај возрасните и децата. Најголемите подобрувања се забележани кај луѓето кои се изложени на екстремен физички стрес, како маратонците и војниците во студени климатски услови, каде витамин Ц може да го намали ризикот од настинка за речиси 50%. Но, кај останатата популација, редовната суплементација не го спречува појавувањето на настинките.
• Терапевтска употреба: Истражувањата што ја испитуваат терапевтската употреба (земено веднаш по појавата на симптомите) не покажуваат убедливи докази дека витамин Ц значително ја намалува тежината или времетраењето на симптомите. Сепак, некои студии сугерираат дека земањето на високи дози при првите симптоми може да помогне кај одредени луѓе.

Што Вели Практиката?

Во секојдневната пракса, суплементацијата со витамин Ц е честопати прв избор за многумина. Ова се должи на неговата безбедност и лесна достапност. Како диететичар, би го препорачала витамин Ц како дел од балансирана исхрана преку свежо овошје и зеленчук. Наместо да се фокусирате само на витамин Ц, важно е да го поддржите вашиот имунитет со разнолика исхрана и да обрнете внимание на останатите нутриенти кои се важни за имунолошкиот систем, како витамин Д, цинк и селен.

Терапевтската употреба на витамин Ц може да се проба, бидејќи тој е генерално безбеден и има ниска цена. Сепак, не очекувајте магични ефекти, особено ако не сте го суплементирале редовно пред настинката.

Дали Суплементацијата Е Потребна?

Најчесто, кај луѓето кои се хранат со разновидна храна, нема потреба од суплементација со витамин Ц. Доколку редовно консумирате овошје како портокали, киви, јагоди или зеленчук како пиперки, брокули и спанаќ, најверојатно внесувате доволно витамин Ц. Но, за оние со зголемени потреби (како пушачи, лица со ослабен имунитет или луѓе со ограничен внес на свежа храна), суплементацијата може да има корист.

Заклучок

Витаминот Ц може да има одредена улога во намалувањето на времетраењето и сериозноста на настинките, особено кај луѓе кои редовно го земаат. Но, тоа не значи дека е гаранција против настинки или дека ќе делува ако го земете само кога ќе почувствувате симптоми. Најдоброто што можете да направите за вашиот имунитет е да се храните балансирано, да спиете доволно и да бидете физички активни.