Банана Гранола
Вкусот на свежа домашна гранола не може да се спореди со купечка. А, зошто би купувале кога гранола се прави прелесно и е дефинитивно поекономично од сите квалитетни граноли што сум ги нашла.
Оваа банана гранола мене можеби ми е омилена, совршена за секој период од годината и со големи крцкави парчиња. Засладена е со малку мед и со бананата и содржи многу јатки коишто се богати со здрави масти. Мојот омилен начин да ја јадам оваа гранола е со грчки јогурт и овошје за доручек или пак со чиа пудинг. Протеините од грчкиот јогурт и мастите и сложените јаглехидрати од гранолата прават балансиран доручек кој ќе ве држи сити со часови.
Состојќи во банана гранола
За оваа гранола ви требаат неколку едноставни состојки коишто можеби веќе и ги имате дома.
- Овесни снегулки – најдобро е да се користат крупни овесни снегулки, но со било какви овесни снегулки ќе добиете супер гранола. Овесните снегулки се богати со сложени јаглехидрати и диететски влакна што се секогаш супер избор за доручек. За безглутенска верзија, купете овесни снегулки кои се означени дека се без глутен.
- Јатки – изборот на јатки е целосно ваш. Јас премногу ги сакам индиските ореви во вакви комбинации. Јатките се богати со масти коишто имаат многу бенефити за нас и нормално ја прават оваа гранола позаситувачка .
- Мед – медот е еден од најдобрите засладувачи за вакви рецепти.
- Кокосово масло – кокосовото масло не само што помага во вкусот туку и во спојувањето на состојките и додавање крцкавост на гранолата.
- Банана – бананата дава прекрасен вкус, блажина на гранолата и помага во правењето на големи крцкави парчиња гранола.
- Суво грозје – даваат блажина и промена на текстурата бидејќи за разлика од јатките и овесот, грозјето има мека текстура.
- Цимет – според мене, неопходен додаток за оваа гранола зашто ни ја дава таа убава арома.
- Кокос и чоколадо – опционални состојки кои не мора да ги додадете, но во мојата гранола МОРА да има барем малку чоколадо.
Совети за подготовка на вкусна гранола
Убаво измешајте ги сите состојки и потоа притиснете ги на хартијата за печење за да се формираат големи парчиња гранола.
- Печете ја гранолата на пониска температура за да не ви загори и да ја добиете таа екстра крцкава текстура.
- Кога ќе ја извадите од рерна не ја промешувајте одма за да не ги растурите големите парчиња.
- Кокосот и сувото грозје додадете ги Kна крај за да не загорат.
Идеи за оброци со банана гранола
Знаеме дека гранолата е супер избор за meal prep и може да ни заштеди многу време во приготвување на доручек. Моите омилени начини да ја јадам оваа гранола е со грчки јогурт и овошје или пак со чиа пудинг. Исто така. гранолата е супер избор за ужина доколку не сте дома. Само спакувајте ја во пластично ќесе или тегличка и имате вкусна и балансирана ужина.
Како да ја чувам гранолата?
Гранолата може да се чува во тегла или во добар пластичен сад. Слободно може да трае и повеќе од 1 месец, но не верувам дека ќе остане неизедена.
Тука погледни како да ја подготвиш гранолата
View this post on Instagram
Банана гранола
Состојки
- 1 банана
- 250 г овесни снегулки
- 250 г микс јатки
- 50 г мед или друг засладувач
- 50 г кокосово масло
- 50 г кокос опционално
- 100 г суво грозје
- 1 лажичка цимет
- сецкано црно чоколадо опционално
Инструкции
- Загрејте ја рерната на 160°С.
- Измешајте ги сите состојки, освен кокосот, сувото грозје и ако користите, чоколадото.
- Ставете ја гранолата на големо тавче обложено со хартија за печење.
- Печете ја околу 30 минути.
- Извадете ја од рерна и ставете го кокосот и сувото грозје и вратете ја да се потпече уште 5-10 минути.
- Почекајте да се олади па складирајте ја во тегли.
