Баровите со вишна се еден од моите најправени рецепти и затоа мислам дека заслужуваа да бидат и на веб-страната. Балансот на вкусови од вишната и чоколадото дава лесен десерт.
Ако не сакате поздрави десерти коишто имаат многу путери од јатки и јатки, тогаш овие барови се за вас. И не се секирајте, се прават прелесно, не ви требаат јаки блендери и процесори за правење и нема цела кујна да ви биде хаос.
Состојки во барови со вишна
Овие барови содржат многу состојки што често ги гледате во поздравите барови, а повеќето можеби веќе ги имате дома.
- Овесно брашно – мелени овесни снегулки што ќе ги користиме за базата.
- Мелени бадеми – ги користиме во комбинација со овесот за базата да биде посочна.
- Кокосово масло – потребно ни е за да се спојат состојките за базата.
- Мед – во овој рецепт како засладувач го користиме во базата и во филот.
- Вишни – главната ѕвезда на овој рецепт.
- Густин – потребен ни е за филот со вишни да се згусне.
- Чоколадо и масло – секако дека мора да има и чоколадна глазура.
Замена на состојки во барови со вишна
- Кокосовото масло може да се замени со путер
- Наместо бадеми може да користите било какви јатки
- Медот може да се замени со друг засладувач. Во филот може да се користи и кафеав шеќер, а за базата можеме да користиме дури и 5-6 урми ако ја блендираме смесата.
Како да го направите овој прекрасен колач со јаболки
- Измешајте или изблендирајте ги состојките за базата.
- Убаво распоредете ја базата во калап отприлика 20х20цм или нешто слично.
- Вишните ставете ги во тенџерче заедно со засладувачот и оставете да зовријат на средна температура.
- Густинот измешајте го со водата и кога ќе зовријат вишните почнете полека да го додавате во нив со постојано мешање за да се згусне убаво.
- Оставете го филот малку да се олади.
- Убаво распоредете го врз базата и одма во замрзнувач да се стегне барем 2 часа
- Исечете барчиња и додека се уште смрзнати покријте ги со стопеното чоколадо.
Други превкусни рецепти што можеби ќе ви се допаднат
Се надевам дека ви се свиѓа овој рецепт исто колку и мене! Ако го пробате, не заборавајте да ми напишете коментар или да ме тагнете на инстаграм на @anamarija.kuzmanovska . Уживајте! <3
Барови со вишна
Состојки
База
- 150 г овесно брашно мелени овесни снегулки
- 150 г мелени бадеми или други јатки
- 3 лажици мед или друг засладувач
- 100 г кокосово масло или путер
- 2-3 лажици млеко по потреба
Фил
- 400 г замрзнати вишни
- 4-5 лажици мед или друг засладувач
- 4 лажици вода
- 4 лажици густин
Глазура
- 150 г чоколадо
- 2-3 лажици масло
Инструкции
- За базата измешајте или изблендирајте ги сите состојки и распоредете ја базата во калап отприлика 20х20цм.
- За да го направите филот вишните ставете ги во тенџерче заедно со засладувачот и гответе ги на средна температура додека не зовријат.
- Густинот измешајте го со водата и додавајте го полека во вишните кога ќе почнат да вријат. Мешајте додека не се згусне.
- Почекајте филот малку да се олади, потоа распоредете го врз базата и ставете ги баровите во замрзнувач барем 2 часа за да се стегнат.
- Кога ќе се стегнат, исечете барчиња (околу 16).
- Чоколадото стопете го заедно со маслото во микробранова или на плоча и покријте ги барчињата со него. Може да ставите чоколадо само горе или на цели барови.