Интерконтинентал торта
Кои се за вас јадењата коишто одма ве носат во некој специфичен момент во минатото? Оваа торта е за мене такво јадење. Откако знам за себе, баба ми ја правеше за мојот роденден и вкусот не може да го надмине ниедна торта.
Сега, редно е моите баби да одмараат, а јас уживам во подготвување на оваа торта за моите најблиски.
Се вика интерконтинентал торта и сигурна сум дека баба ми го видела рецептот на некоја емисија или пак во храна и вино.
Иако можеби изгледа комплицирано, оваа торта е навистина едноставна за правење и со секое наредно правење тортата ќе ви изгледа поубаво.
Пандишпаните се со орев и има три филови: кокос, јатки и чоколадо. Секој спрат завршува со тенок слој топено чоколадо.
За украсување е најубаво да користите обичен шлаг.
Се надевам дека доколку некогаш ја направите оваа торта, ќе уживате во неа колку јас и моето семејство.
Тука погледни го видеото од рецептот:
Други превкусни рецепти што можеби ќе ви се допаднат
Се надевам дека ви се свиѓа овој рецепт исто колку и мене! Ако го пробате, не заборавајте да ми напишете коментар или да ме тагнете на инстаграм на @anamarija.kuzmanovska . Уживајте! <3
Интерконтинентал торта
Состојки
- 12 јајца
- 12 лажици шеќер во прав е поубаво
- 18 лажици мелени ореви
- 16 лажици брашно
- Прстохват прашок за пециво
- 1 литар млеко
- 250 грама путер
- 150 грама шеќер во прав
- 100 грама сецкани ореви или лешници
- 60 грама кокос
- 280 грама чоколадо
Инструкции
- Се матат три пандишпани, по желба може и секој посебно.
- За еден пандишпан се матат 4 белки во цврст снег.
- Потоа во нив се додаваат 4 лажици шеќер (во прав), 6 лажици мелени ореви, 1 лажица брашно и прстохват прашок за пециво.
- Се ова се соединува внимателно, најубаво со шпатула, и се става на тавче обложено со хартија за печење. Може да печете во тавчиња со димензија 22-26цм и во сите ќе испадне добро.
- Вака правите три пандишпани.
- Пандишпаните се печат околу 15 минути на 180 степени, кога ќе ги боцнете со нож или чепкалка, тие да бидат чисти. После печење се превртуваат внимателно и се вади хартијата.
- За филот се матат 12 жолчки, 8 лажици шеќер, 13 лажици брашно. Потоа се додава 1 литар млеко и од ова се вари филот на средна температура со постојано мешање.
- После варењето филот се остава да се излади,
- Се мати путерот со 150 грама шеќер во прав и се додава во изладениот фил и се мати за да се изедначи. Филот го делите на три дела.
- Во првиот додавате 60 грама кокос, во вториот 100 грама сецкани јатки, а во третиот 100 грама стопено чоколадо.
- Почнувате со филување.
- На првиот пандишпан го ставате филот со кокос па врз него ставате 60 грама стопено чоколадо (јас го топам со малку масло).
- Потоа се става вториот пандишпан, па филот со јатки, слој од 60г топено чоколадо.
- На крај се додава третиот пандишпан, чоколадниот фил и тортата се завршува со уште еден слој чоколадо.
- Најдобро е да се остави да се стегне преку ноќ пред да ја украсувате и да и ставите шлаг.
- За мојата требаше околу 3 ќесички шлаг.
