Ова bbq пилешко е сочно, превкусно, совршено за meal prep и најдобро од се, може да се комбинира во многу различни оброци. Се подготвува брзо и лесно и стои свежо до 3 дена, единствено треба да го загреете малку во микробранова или на плоча.
Денес со вас споделувам 3 оброци кои ги подготвувам постојано со ова bbq пилешко. За сите ви требаат помалку од 10-15 минути што значи имате здрава вечера за многу кратко и без многу труд.
BBQ сендвич
Еден од омилените начини да го искористам bbq пилешкото месо е во ваков сендвич. Ставаме од пилешкото на свежо лепче, врз него ставаме кашкавал и го ставаме во рерна да се потпече кашкавалот. Потоа додаваме свежа салата и дресинг по желба. Состојки што ви требаат:
- bbq пилешко
- лепче
- кашкавал
- патлиџан и свежа салата
- sweet chili сос или друг дресинг по желба
Оброк со ориз и bbq пилешко
Комплетен и балансиран оброк. Во него има долгозрнест ориз, исечена и испечена бабура, свежа салата, bbq пилешко, авокадо, пченка/грав од козерва и секако мојот омилен sweet chili сос. Ова ми е навистина во топ 5 оброци и е на нашето мени скоро секоја недела.
Такоси со bbq пилешко
Потпечете ги тортиљите, ставете загреано bbq пилешко, свежа салата, пченка од конзерва и sweet chili сос или дресинг со јогурт и буквално имате комплетен оброк за 5 минути.
Други превкусни рецепти што можеби ќе ви се допаднат
Се надевам дека ви се свиѓа овој рецепт исто колку и мене! Ако го пробате, не заборавајте да ми напишете коментар или да ме тагнете на инстаграм на @anamarija.kuzmanovska . Уживајте! <3
Barbecue пилешко
Состојки
- 500 г пилешки стек
- сол и лук во прав
- 1/2 чаша вода може и повеќе
- 100 г барбекју сос (може и помалку/повеќе во зависност од која фирма користите)
- 1 лажица маслиново масло
Инструкции
- Во нелепливо тенџере или поголемо тавче загреано на средна температура ставете ги пилешките стекови заедно со маслиновото масло.
- Ставете сол и други зачини по желба и кога ќе добијат боја ставете вода и покријте го тенџерето со капак. Вака ќе може стекот да се вари поспоро и да биде сочен.
- Кога ќе испари водата видете дали е зготвено и меко пилешкото, по потреба додадете уште малку вода.
- Исцепкајте ги стековите со вилушка или исецкајте ги за побрзо. Јас овојпат ги исеков, иако малку повеќе ми се свиѓаат исцепкани.
- Вратете ги стековите во тенџере. Ставете BBQ сос и барем 2-3 лажици вода. Ако е појак сосот може и повеќе.
- Оставете да се крчка 5-10 минути за стекот да добие убав вкус. Промешувајте за да не загори.
